8. схадзкa Предсидательства
З А П И С Н Ї К
зоз 8. схадзки Предсидательства Дружтва за руски язик, литературу и
културу, хтора отримана 26. юния 2008. року на
16,00 годзин у Заводу за културу Войводини, Нови Сад
На схадзки присуствовали Владимир Дудаш, др Юлиян Рамач, Мария Бесерминї, Славко Пап, Владимир Манько, Владимир Дороґхази, Анита Ґовля, Александар Мудри, Наталия Рамач, Владимир Салонски и Ирина Папуґа. Зоз „Руского слова” присуствовала Оленка Сакач Планчак. Зоз схадзку руководзел Владимир Манько, член Предсидательства Дружтва. На початку схадзки зоз минуту цихосци одата почесц нєдавно умартим членом и почитовательом Дружтва: писательом Дюрови Папгаргайови (Нови Сад) и Момови Димичови (Беоґрад), Амалиї Сабадошовей, директорки ОШ зоз Дюрдьова и Иринки Канюховей (Сримска Митровица).
ДНЬОВИ ШОР:
I НОВЕ ВИДАНЄ ДРУЖТВА И РУСКЕЙ ФОНДАЦИЇ:
Юлиян Пап: Good Morning! We learn English / Добре рано! Учиме ше по
анґлийски
II
1. Записнїк зоз 7. схадзки Предсидательства Дружтва;
2. Препатрунок активносцох медзи двома схадзками;
3. Литературни конкурси 2008/2009. року;
4. http://www.druztvo.org - www сайт Дружтва;
5. Aктивносци Дружтва у II половки 2008. рока;
6. Р и ж н е
I
О новим виданю Дружтва и Рускей фондациї, автора Юлияна Папа: Good Morning! We learn English / Добре рано! Учиме ше по анґлийски бешедовал др Юлиян Рамач, рецензент и надпомнул же таке виданє потребне початнїком хтори виучую анґлийски язик. Промоция кнїжки, на хторей вежнє учасц и автор кнїжки, (одсутни пре нєрухомосц), а тиж и рецензенти др Михайло Фейса и Каролина Джуджар, як школяре основней школи и пред. установи отрима ше у Руским Керестуре початком септембра 2008. року. Цена по прикладнїку виноши 240,00 динари.
II
Точка 1.
Записнїк зоз 7. схадзки Предсидательства Дружтва, отриманей 1. марца 2007. року у Новим Садзе прилапени зоз надпомнуцами: ювилейне 15. стретнуце руских школох ше планує у Новим Орахове 2009. року, а 16. евентуално у Сримскей Митровици 2010. року (точка 4), видаванє часописа „Ерата над Куцуром/Коцуром” пренєшене (зоз спорозуменьом) на Културно-просвитне дружтво ДОК зоз Коцура, рецензенти кнїжки линґвистичних роботох мр Гелени Медєши буду др Михал Тир, др Юлияна Рамач и др Михайло Фейса, кнїжка Основна школа у Бачинцох Ирини Папуґа пририхтана за преламованє, а обезпечени и фин. средства за друкованє з боку покраїнских секретариятох за образованє и културу и за нац. меншини зоз потримовку Националного совиту Руснацох (40.000,00), закончи ше кнїжка о Руснацох у Новим Орахове (точка 5).
Точка 2.
Препатрунок активносцох медзи двома схадзками прилапени. Прекоментаровани акциї вязани за успишну промоцию виданьох Дружтва зоз наступом женскей шпивацкей ґрупи Дома култури зоз Руского Керестура и виставу портретох Стевана Боднарова зоз Ґосподїнцох у Беоґрадзе, потим Републичне змаганє з руского язика у Руским Керестуре и 14. стретнуце руских школох зоз надпомнуцом же на стретнуцу у Вербаше участвовали и обидва наставнїци руского язика зоз Републики Горватскей: Мария Хома зоз Миклошевцох и Наталия Гнатко зоз Петровцох зоз пецерима школярами и родичами дзецох. З тим у вязи предложене же би ше сотруднїцтво на планє руского язика и литератури зоз тима штредками интензивовало насампредз у рамикох Актива наставнїкох руского язика, або же би ше иницировало стамнєйши фурми сотруднїцтва, напр. форум язичних стретнуцох раз у року яки предложени 7. фебруара 2008. року у розгваркох зоз представителями ЕУ у Новим Садзе.
Точка 3.
Литературни конкурси за 2008/2009. рок ше одноша на творчосц
проф. Гавриїла Г. Надя, др Мафтея Виная и Штефана Чакана (тексти конкурсох
у прилогу). Активносци координує Дружтво, а награди обезпечую: Фондация
Таґасович зоз Суботици за конкурс др Мафтея Виная, Любица Чакан зоз
Нового Орахова за конкурс рускей басни Штефана Чакана, а предложене
же би награди зоз конкурсу проф. Гавриїла Г. Надя по можлївосци потримала
Руска фондация.
Александер Мудри информовал о Першим медзинародним фестивалу поезиї
„Дюра Папгаргаї”, 13. авґуста 2008. року у Новим Садзе у орґанизациї
Сцени Шицких Креативних (по инициятиви писателя Стояна Симича Крпици)
зоз жаданьом же би ше зачувала памятка на писателя Дюру Папгаргая.
Точка 4.
Дружтво ма дочасови www сайт http://www.druztvo.netfirms.com/, хтори
2007. року иницировал Мирослав Парошкай, алє ше планує тирвацше ришенє
зоз новим дизайном и випатрунком, та з тим у вязи анґажовани CIFLY d.o.o
Нови Сад (зоз фахову потримовку Ясни Варґа-Бєлобрк) чиї хостинг пакет
виноши 2.000,00 дин. Нови www сайт Дружтва будзе ношиц назву http://www.druztvo.org.
Точка 5.
Календар мешачних активносцох Дружтва у другей половки 2008. року
прилапени зоз надпомнуцами же з нагоди означованя 80-рочнїци од народзеня
учительки Цецилиї Цап Гаргаї, хтора жиє у Райовим Селу, а тиж и Геленки
Канюховей з нагоди 70-рочнїци послати винчованки на хторих обидва подзековали.
О отримованю 4. подобовей колониї Стретнуце у Боднарова (18-20.07.2008)
и 7. дзецинскей (19.07.2008) у Ґосподїнцох информовал Владимир Салонски.
Пририхта ше и подпише спорозуменє Дружтва, Основней школи и Месней заєднїци
о орґанизациї колониї. Средства за тогорочну колонию наявели Општина
Жабель (50.000,00) и ПСОК (20.000,00), а обчекує ше потримовка и єдного
числа спонзорох и донаторох зоз Ґосподїнцох итд.
У орґанизациї Подружнїци и Народней библиотеки у Руским Керестуре буду
означени рочнїци Ферка Пап Радваня, Михаила Поливки, Константина Петриґали
и Янка Олеяра (у септембре), а будзе представени и словнїк биолоґийних
терминох.
Коло 160-рочнїци насельованя Руснацох до Бикичу надпомнуте же з тим
у вязи отримана шветочносц у рамикох „валяня майского древка” у Бикичу.
Намагац ше же би ше у Шидзе означело 190 роки рускей школи и 80 роки
од народзеня учительки Ксениї Саламоновей, а тиж представело нови виданя
Дружтва и придалo прикладнїки Studia Ruthenici 12, 2007 Васильови Мудрого
и Славкови Загорянскoго. Тиж пошвециц повагу означованю рочнїцох писательох:
Миколи М. Кочиша, Владимира Сабо Дайка и Гелени Гафич Стойков, подобових
уметнїком Гелени Канюховей и Силвестера Пушкаша, як и Гавриїла Колєсара
творителя у виртуалним швеце хтори жиє у Канади
У рамикох видавательней дїялносци пририхта ше нове 13. число Зборнїк
роботох Studia Ruthenicа за 2008. рок зоз змистом хтори начално евидентовани
на прешлей схадзки Предсидательства, а о хторим будзе слова и на схадзки
редакциї Зборнїка. Др Юлиян Рамач предложел же би ше по можлївосци видало
и окремни кнїжочки дипломских роботох скорейших студентох Катедри за
руски язик и литературу: о дзециньских бавискох, о рускей хижи, руским
облєчиве, руских єдлох итд!!!
Точка 6.
Евидентоване предкладанє же би Славица Мали, наставнїк руского язика
зоз Вербасу достала припознанє- плакету проф. Гавриїла Г. Надя за 2008.
рок (успишно орґанизовала 14. стретнуце руских школох у Вербаше, єй
школяре кажди рок доставаю припознаня на змаганю з руского язика итд),
а надпомнуте же на планє руского язика успишни и Ксения Шовш (Руски
Керестур), Снежана Шанта (Коцур), Мария Стрибер (Кула)итд.
За предсидателя Мемориялу проф. Гавриїла Г. Надя на место покойного
Дюри Папгаргая предложени др Юлиян Рамач, потерашнї подпредсидатель.
Схадзка закончена на 18,15 годзин.
Записнїчар: Наталия Рамач
секретар Дружтва
Владимир Манько, член Предсидательства Дружтва
